Gipangalanan sa contractor nga si Curlee Discaya ang unom ka mga kongresista ug duha ka kanhing opisyal sa gobyerno nga giingong nakadawat og kickbacks gikan sa mga flood control projects nga makita sa usa sa iyang payoff ledger.
Lakip sa mga gihisgutan ni Curlee sa Senate Blue Ribbon Committee hearing kagahapong adlawa mao ang mga bag-o ug kanhing kongresista nga sila: Pasig City Rep. Roman Romulo, kanhing Quezon City 4th District Rep. Marvin Rillo, Caloocan City 3rd District Rep. Dean Asistio, Quezon City 5th District Rep. Patrick Vargas, Quezon City 6th District Rep. Ma. Victoria Co-Pilar, ug Uswag Ilonggo Partylist Rep. James “Jojo” Ang.
Lakip usab sa iyang gipangalanan sila kanhing Presidential Assistant for the Visayas Terence Calatrava ug kanhing DPWH Undersecretary Roberto Bernardo.
Gibutyag ni Curlee nga adunay pa kunoy nabiling ledger sa ilang balay, apan wala nila kini makuha tungod sa kakulangon sa oras.
Gisumite sa magtiayong Discaya ang nakuha nilang ledger ngadto sa Senate Blue Ribbon Committee.
Sa sayo pa kagahapon, gitugotan sa komite ang magtiayon nga sila Curlee ug Sara Discaya nga temporaryong mogawas gikan sa pagdungog kabahin sa flood control anomaly aron makuha ang mga dokumentong naglangkob kuno sa impormasyon sa mga indibidwal nga nalambigit sa maong iskandalo.
