Tingkagol sa selda ang unom (6) ka drug suspect ug nakumpiska ang gibana-banan nga 307 gramos nga gituohang shabu atol sa gihimong buy-bust operation sa Davao del Sur Provincial Office sa Philippine Drug Enforcement Agency (PDEA) Regional Office 11.
Ang maong operasyon gihimo pinaagi sa koordinasyon sa Regional Drug Enforcement Unit 11, 1104th Regional Mobile Force Battalion, ug Digos City Police Station pasado alas-6:00 sa gabii sa Purok Durian, Barangay San Miguel, Digos City, Davao del Sur.
Ang nag-unang target sa operasyon mao si alyas Brader, 37 anyos, nga giingong tag-iya o tigdumala sa drug den, nadakpan human mibaligya og usa ka sachet sa gituohang shabu ngadto sa undercover agent sa PDEA.
Lakip usab nga nadakpan mao si alyas Rodel, nga gi-report nga empleyado sa drug den, ug ang mga bisita sa drug den nga giila nga sila si alyas Jessie, Edilberto, Jerold, ug Maynard.
Nakumpiska sa operasyon ang upat (4) ka heat-sealed transparent plastic sachets kon shabu, ingon man nga nagkalain-laing drug paraphernalia, ug ang marked buy-bust money.
Sa pagkakaron ang mga suspetsado mag-atubang og mga kaso ilawom sa Republic Act 9165, o ang Comprehensive Dangerous Drugs Act of 2002.
