Mokabat sa 1,722 ka mga indibidwal nga nakasupak sa anti-smoking ordinance dinhi sa dakbayan ang gipangdakop sukad niadtong Enero hangtod sa Marso ning kasamtangang tuig, sumala pa sa Vices Regulation Unit (VRU).
Alayon kini sa ika baynte dos ka tuig nga anibersayo sa anti-smoking campaign dinhi sa dakbayan ug World Tobacco Day, gikanayon ni VRU officer-in-charge Hernando Las nga sa unang bahin karong tuiga, ang ihap sa mga nadakpan ang misaka kung itandi sa susamang panahon sa miaging tuig, anaa lamang sa 1,630.
Gihatagan sab ug gibug-aton sa opisyal ang kamahinungdanon sa paglikay sa maong bisyo nga dili lamang kini makaayo sa panglawas apan lakip na sab sa syudad ug sa kinatibuk-an.
Samtang gikanayon ni Councilor Luna Acosta, ang principal author sa giamyendahan nga Local Comprehensive Anti-Smoking Ordinance, gibutyag niini nga ang LGU nakita niini ang panginahanglanon sa pagrebisa ug pagpalig-on sa ordinansa.
Kini human nga miguwa ang resulta sa pagtuon nga gipahigayon sa City Anti-Drug Abuse Council (CADAC)nga nagpakita nga daghan ang mga minors ang nagaadto sa mga bar ug mga club ug sila ang ginahatagan ug ilimnong makahubog ug mga sigarilyo. Dugang pa sa pagtuon sa CADAC nga adunay mga linghod pa ang pangidaron apan nakakat-on na sa pagtabako nga ang labing bata nga natala, sais anyos.
Una nga gipasalig ni Mayor Sebastian Duterte ang lokal nga panggamhanan ang magpadayon sa pagpaluyo alang sa pagpakusog sa pagkontrola sa tabako kon sigarilyo ug maglatag ug mga palisiya ingon man ang pagpataas sa kahibalo pinaagi sa mga kampanya ug programa alang sa pagpugong sa tobacco-related diseases.
Gipasalig sab niini nga magpadayon ang tinguha sa lokal nga panggamhanan sa pagpromotar sa panglawas sa katawhan ug pagpalambo sa kultura aron nga mahimong smoke-free ang dakbayan.
