Gitay-og sa kusog nga linog ang Bogo City, Cebu alas 9:59 kagabii. Ang maong pagtay-og nasinati-an usab sa mga kasikbit nga mga syudad ug munisipalidad ingon man mga silingang probinsya sa Cebu nga nakaangkon usab og mga danyos.
Sa bahin sa Cebu, nakaangkon og danyos ang Daanbantayan, Cebu City, ug uban pang mga lugar.
Subay sa datos gikan sa Philippine Institute of Volcanology and Seismology (PHIVOLCS) adunay gilawmon nga 0.10 km nga kini miigo sa gilay-on nga 17 km sa amihanang sidlakan sa Bogo City, Cebu.
Samtang nasinati-an usab ang Intensity III sa San Fernando, Intensity II sa Laoang, Northern Samar.
Samtang natala usab ang Instrumental Intensities sa Cebu City nga Intensity VI, Villab ug Leyte.
Samtang nasinati-an usab ang pagtay-og sa Sorsogon sa Bicol, Bacolod sa Negros ug Ilo-Ilo City.
Subay sa ulahing datos nga gipaguwa sa PHIVOLCS, gisaka ngadto sa 6.9 magnitude ang nahitabong pagtay-og nga unang gikatala nga 6.7 magnitude.
Samtang atol sa maong pagtay-og nakuhaan og video ang pagkahulog sa mga debris sa Archdiocesan Shrine of Santa Rosa de Lima sa Daanbantayan.
Usa usab ka inila nga fastfood chain sa nasud ang nakasinati og dakong kadaot sa Bogo City.
Samtang adunay misilaob nga usa ka sunog sulod nga bahin sa usa ka dakong mall sa lungsod sa Consolacion human sa pagtay-og.
Nakaangkon usab og mga danyos sa semento nga karsada nga nangliki ilabi na sa Tabogon, Cebu nga sa pagkakaron, ongoing ang gipahigayon nga clearing operation sa lokal nga kagamhanan aron masusi kung luwas pa ba kini maagian.
Usa ka dakong mall nga adunay Casino nga nahimutang sa South Road Properties nakasinati usab og danyos.
Natala usab ang pipila ka mga kadaot sa istruktura nga padayon pang ginasubay karong panahuna.
Samtang sa ulahing gipaguwa nga datos sa lokal nga panggamhanan, adunay 19 na ang natalang patay samtang sa pagkakaron, ginasuta pa ang kinatibuk-an ihap sa mga naangol tungod sa maong pagtay-og nga ang mga nagrabihan ang padayon pa nga ginatambalan sa mga nagkadaiyang ospital.
Gilayon usab nga nagpaguwa og TSUNAMI ADVISORY ang DOST-PHIVOLCS diin gipahimangnuan ang mga anaa sa mga dapit sa kabaybayonan nga daling mubakwit sa mas luwas nga lugar.
Karong adlawa, adunay gipatuman nga suspensyon sa klase sa nasampit nga probinsya ug pipila ka mga silingang probinsya og rehiyon sa Visayas gumikan sa maong pagtay-og.
