Nagmalampuson ang gipahigayon nga 5th City-Wide Earthquake ug Tsunami “Shake Out” Simulation Exercise dinhi sa dakbayan sa Davao kaganihang buntag.
Ang maong kalihukan gisalmutan sa nagkadaiyang sektor dinhi sa dakbayan alang sa preparasyaon og kaalam sa mga pagabuhaton sa panahon sa emerhensiya.
Gipangunahan kini sa lakal nga panggamhanan pinaagi sa Davao City Disaster Risk Reduction and Management Office (CDRRMO) isip kabahin sa pagsaulog sa National Disaster Resilience Month (NDRM).
Tumong niini nga mapasiguro ang kahandaan ug kaluwasan sa katawhan sa panahon sa linog ug uban pang katalagman.
Gi-awhag ang tanan nga magpabiling aktibo ug mosunod sa mga sugyot sa mga awtoridad.
Usa sa mga nipartisipar ang ang mga iskolar ug kawani sa Philippine Science High School Southern Mindanao Campus (PSHS-SMC) ingon man ang mga tinun-an ug magtutudlo sa Matina Central Elementary School sa Matina Crossing, ning syudad sa Davao.
Lakip usab ang mga tinun-an sa Matina Central Elementary School nga mipahigayon sa “drop, cover, and hold”.
Makita sa mga ginahimo sa mga estdyante ang gilayon nga pagkanaog ngadto sa luwas nga dapit isip kabahin sa city-wide earthquake ug tsunami drill.
Ang DOLE Regional Office XI aktibo usab nga misalmot sa maong simulation exercise kaganihang buntag diin tibuok kawani usab mipahigayon sa “Drop, Cover, and Hold On” drill isip kabahin sa panagsabot nga paningkamot sa pagpalig-on sa kaandam sa katalagman ug pagpalambo sa kultura sa kaluwasan sa lugar sa trabaho.
Kahinumduman nga una ng nagpahibalo ang syudad sa usa ka city-wide full-scale earthquake ug tsunami simulation exercise karong adlawa.
Gumikan niini mihangyo ang mga residente nga mosalmot pinaagi sa pagpraktis sa “Drop, Cover, and Hold On” sulod sa usa ka minuto, ug dayon evacuation padulong sa mas luwas nga lugar.
Nag-awhag usab lokal nga panggamhanan nga sayron ang ilhanan sa posibleng tsunami diin ang Operations Center (OpCen) magpagula og pahimangno ug magpatingog og sirena aron alertohon ang mga naa sa peligro nga lugar nga modangat gilayon sa taas nga lugar.
Gipahimangnoan usab sa mga opisyal ang publiko nga kini usa lamang ka simulation ug wala’y angay nga ikabalaka.
