Hugtanon na gipatuman sa syudad sa Tagum ang 5S kontra dengue gumikan sa nagpadayong pagsaka sa ihap sa mga bata nga nataptan sa maong sakit.
Subay sa pinakaulahing talaan sa CHO-Tagum, lampas gihapon sa epidemic threshold ang datos sa dakbayan diin nikabat sa 95 ang natala gikan Agosto 4 hangtod 10, ning tuig kasamtangan.
Nakatampo sab ang maong ihap alang sa 1,247 nga kinatibuk-ang natala nga kaso karong tuiga.
Alayon niini, mas gipakusgan karon sa mga purok ug barangay ang pagmintinar sa kalimpyo sa palibot aron makunhuran ang padayong pagtaas sa ihap sa dengue cases sa Tagum City.
Subli sab gipahinumduman sa buhatan ang katawhan nga kung galing makabati og sintomas sa sakit nga dengue, gilayong magpakonsulta sa mga doctor aron dayon kining matagaan ug pagtagad.
Samtang dinhi sa dakbayan sa Davao, giklaro sa CHO nga walay dengue outbreak sa syudad apan dili lamang gihapon magkumpyansa.
Tungod sa maong mensahe, nagsugod na sa pag monitor ang CHO sa mga nagkadaiyang barangay aron nga makontrola ang pagsaka sa ihap niini, inubanan sa kanunay nga paghinlo sa palibot hilabi pa sa mga dapit nga pwedeng maitlogan sa mga lamok.
