DAVAO DEL SUR – Patay ang usa ka 53 anyos na lalaki human gitigbas patay niadtong Domingo, Hunyo 23, alas 8:00 sa gabie sa Purok 6, Brgy. Pitu, Malalag, Davao del Sur.
Giila ang suspek nga si alyas Jun, 30 anyos, minyo, mag-uuma, ug residente sa Purok 6, Brgy. Pitu, Malalag, Davao del Sur.
Samtang giila ang biktima nga si Daniel Tagusi Ehem, 53 anyos, minyo, mag-uuma, ug residente sa susamang dapit.
Subay sa imbestigasyon nga gihimo, bandang alas-8:00 sa gabii dihang, nanghasi ang biktima sa iyang igsuong babaye nga si Leonora Ehem Cupin, 52 anyos, minyo, kapuyo, ug residente sa Purok 7, Brgy. Pitu, Malalag diin ang rason sa pagpanghasi mao nga gitambagan siya sa igsoon nga mohunong na sa pagpamikil nga maoy nahimong rason nga nasuko pag-ayo ang biktima.
Nidagan dayon ang biktima paingon sa suspek nga nagkupot og lagaraw ug nisuway pagtigbas sa maong suspek.
Apan, nakalikay ang suspek dayon giilog ang bolo ug diha-diha gitigbas ang biktima nga naigo sa buko-buko nga maoy hinungdan sa pagkahagba niini sa yuta.
Gitigbas na usab sa suspek ang biktima nga naigo sa tuong bahin sa nawong nga maoy resulta sa hinanaling kamatayon.
Human sa insidente, gihatag sa suspek ang bolo ngadto kang Leonora Cupin ug boluntaryong mitahan sa Brgy. Kapitan.
Ang patayng lawas sa biktima anaa karon gihaya sa Rivera Funeral Home, Brgy. Bulacan, Malalag, Davao del Sur.
Daan nga pagdumot ang hinungdan sa pagpanigbas. Ang suspek anaa na karon sa kustodiya ning maong buhatan alang sa tukmang disposasyon.
