Balhog sa selda sa kapulisan sa Sasa ang 51-anyos nga lalaki human kini naaktuhan nga nag-shoplift sa usa ka dakong tindahan sa Barangay Pampanga, Lanang, kagahapon.
Subay sa impormasyon, ang supervisor sa Lots for Less ang nidangop sa kapulisan aron nga magpatabang kalabot sa nasampit nga panghitabo.
Ang suspek giila nga si Arnel, hamtong ang pangidaron nga residente sa Lougemar Village, Old Airport Road, Brgy. Sasa, ning dakbayan.
Sumala pa sa imbistigasyon nga pasado alas dos sa hapon, naatlan sa Supervisor sa nasampit nga establisamento ang suspetsado nga anaa sa duol sa gawas sa entrance o exit nga dala ang mga items nga gisulod sa cellophane nga wala moagi sa counter.
Nasayran nga ang anaa sa sulod sa cellophane ang tag-usa ka bag nga cheesedog, chili ug cheese hotdog, Beffries; samtang adunay duha pa ka mga pack nga DELI Cheese; pito ka mga pack sa hopia ug dice.
Nasayran nga tanang narekober nga mga produkto ang nagkanidad ug P1, 667.35. Sa karon, padayon pang ginapanubayan ang maong panghitabo kung kini ba ang pasakahan ug kaso o dili kaha pabayran na lamang sa management sa maong tindahan ang mga gipangkuha nga mga baligya.
Sagad sa mga palisiya sa tindahan, kanapulo ka higayon nga pagabayaran ang kantidad sa nakuhang produkto. Kung sumahon, mamahimong pagabayran sa dinakpan ang kinatibuk-an nga kantidad nga kapin 10 mil.
