DAVAO CITY – Nakompiska sa mga otoridad ang dul-an usaka gatus nga ream sa illegal nga sigarilyo nga gisulayan sa pagpalusot sa checkpoint sa Sirawan, Toril ning dakbayan sa Dabaw.
Gikanayon ni Capt. John Louie Dema-ala, public information officer sa task force Davao nga alas 9:50 ang takna sa kagabihon sa dihang nababagan sa mga ginisakupan sa TF Davao ang nahisgutang mga illegal nga sigarilyo nga gibana-banaang nagkantidad ug halos 50 mil ka pesos.
Giila ang mga dinakpan nga sila Viejay B. Sahidain, 35 anyos, residente sa Purok 20, Acacia, Calinan; Marvin A. Anub, 32 anyos, residente sa Purok 4, Barangay Tamayong, Calinan; ug Palma E. Sahidain, 36 anyos, residente sa Purok 6, Barangay 23-C Mini Forest, Davao City.
Sakay ang nahisgutang mga suspect sa usaka kolor orange nga Toyota Wigo nga adunay plate number LAH 3262. Dugang pa ni Capt Dema-ala nga nasikop ang tulo ka mga suspect human usab makompiska ang moabot sa 50 ka ream sa imported nga sigarilyo nga Nelson sa mao gihapong checkpoint sayo sa buntag niadtong adlaw nga sabado.
Gibutyag sa mga otoridad nga ang na-unang nakompiskang illegal nga sigarilyo nga nagkantidad ug 25 mil ka pesos ang gipaang-iyahan sa usaka Jul-Amir Asiri Ambutong, 45 anyos, ug residente sa Malasugat Sangali, Zamboanga City, kinsa sakay sa usaka gray nga Nissan Navara pick-up nga adunay plate number LDP 3449 pasulod dinhi sa dakbayan sa dabaw. Giandam na usab ang tukmang kaso nga ipasaka batok sa mga nahisgutan.
