DAVAO CITY – Anaa sa 50 ka mga kaso sa children in conflict with the law (CICL) ang natala sulod lamang sa bulan sa Enero ning kasamtangan nga tuig sa Women and Children’s Protection Desk (WCPD).
Matud pa kang Davao City Police Office (DCPO) spokesperson Senior Inspector Catherine dela Rey, kasong physical injury ang nag-una sa listahan sa mga kaso nga gikalambigitan sa mga minor de edad. Sa nahisgutan nga mga kaso, sagad niini ang natala sa Tugbok Police Station.
Gawas sa Physical injury nagsunod niini ang kasong pagpangawat, nga anaa sa napulo ang natalang reklamo diin upat niini ang natala sa San Pedro Police Station, duruha sa Sta. Ana ug Sasa Police Stations, ug tig-usa sa Toril ug Tugbok police stations.
Ang Robbery cases nga giduso batok sa CICL ang nag-una sa record sa Talomo Police Station. Lima ka kaso sa kalapasan sa firecracker ug tulo sa kaso sa kalapasan sa Republic Act 9165 o Comprehensive Dangerous Drugs Act, duruha ka frustrated murder cases, murder, illegal possession of deadly weapon, ug rape ang sagad usab sa mga kaso nga giduso. Gipasalig karon sa kapulisan nga makunhuran ang nahisgutan nga mga kaso pinaagi sumala pa sa programa sa mga kabataan nga gipatuman karon sa WCPD-DCPO.
