DAVAO CITY –
Andam na ang lugar diin ipahigayon ang libre nga paniudto alang sa tanang katawhan ning syudad sa Dabaw ugmang adlawa atol sa katapusang adlaw sa selebrasyon sa ika- 81 nga Araw ng Dabaw.
Sumala pa kang Davao City Transportation and Traffic Management Office (CTTMO) Head, Dionesio Abude, gi-andam na nila ang mga babag nga puthaw nga gamiton ugmang adlawa alang sa giandam nga libreng paniudto.
Himuon kini sa usaka portion sa dalang Claveria ning syudad nga manukad sa kanto San Pedro hangtud sa kanto usab sa Rizal Extension.
Kahinumduman nga una nang giawhag ni Mayor Sara Duterte – Carpio ang tanang Dabawenyo sa usaka paniudto diin naay 50 ka mga letchong baka ang ipakaong libre.
Gihatag sumala pa kini sa Filipino May Puso Foundation nga mao usab ang mipaluyo sa mga boodle fight nga gitambungan ni mayor inday sara uban ang mga empleyado sa gobyerno niadtong milabay nga semana.
Dugang pa ni Abude nga ipakatag sa CTTMO ang tanan niini nga personahe aron masigurong hapsay ang mgma kadalanan sa syudad.
Gawas sa 230 ka mga personahe sa CTTMO, magsilbi usab isip force multiplier ang dul-an usaka gatus ka mga volunteers gikan sa TRAFON o Traffic Community Network – usaka grupo nga kanunayng motabang sa syudad sa pagbantay sa kadalanan matag panahon nga adunay mga aktibidad ang dakbayan sa Dabaw.
