DAVAO CITY – Gikatakda karong Hulyo 16, 2021 ang pagdungog sa lima sa unom ka mga human rights activists human nga nakaduso kini og piyansa sa Regional Trial Court-Branch 12 ning dakbayan sa dabaw.
Una ng nag-atubang ang mga nahisgutan ug kasong child abuse gumikan sa presensiya sa Lumad evacuees sulod sa Haran Evacuation Center of the United Church of Christ ning siyudad.
Kahinumduman nga gimandoan gilayon ni Presiding Judge Dante A. Baguio ang otoridad nga dili na sikupon sila si Bishop Hamuel Tequis, Rev. Daniel Palicte, Ephraim Malazarte, Lindy Trenilla, ug Grace Avila human nga nakaduso ang mga nahisgutan ug piyansa nga P300,000 o P60,000 matag usa kanila.
Gikanayong si Jong Monzon, Secretary-General sa PASAKA Confederation of Lumad Organizations in South Mindanao Region, usa sa mga akusado sa “administrators ug personalities” sa Haran, ang wala miduso sa iyang piyansa.
Una ng gibutyag ni Police Regional Office Davao director BGen. Filmore B. Escobal nga gipagula ang arrest warrant batok sa mga nahisgutan gumikan sa kalapasan sa Republic Act 7610 o mas nailang Special Protection of Children against Child Abuse, Exploitation and Discrimination Act o Anti-Child Abuse Law.
Gikanayong ang mga nahisgutan ang responsable sa kamatayon sa bata sulod sa evacuation center atol sa pandemic ug wala gi-report sa mga nahisgutan sa City Health Office ang kondisyon sa bata nga nag-antus ug balatian.
Pipila sa mga lumad sa haran ang una ng naluwas sa kaniadtong 2015 human nga mireklamo na ang mga leaders ug pamilya sa mga nahisgutan gumikan kay wala na kini nakauli sa ilang komunidad.
