5 patay sa nahitabong avalanche sa Italy

Patay ang lima ka German climbers human maigo sila sa avalanche sa Dolomite Mountains sa Italy.

Ang mga mountaineers nagbaktas sa lain-laing grupo, ug samtang nagasaka sila sa Cima Vertana sa Ortler Alps, kalit nga miigo ang kusog nga pag-uyog ug pagdahili sa niebe (snow avalanche).

Lakip sa nadala sa avalanche ang mag-amahan, ug human sa pipila ka oras nga pagpangita, narekober ang ilahang mga lawas.

Ang maong lugar sikat nga destinasyon sa mga mountain climbers, ug sumala pa maayo ang kondisyon sa panahon sa adlaw nga nahitabo ang insidente.

Bisan pa niana, natingala ang mga otoridad kung ngano sa hapon pa nagsugod ang hiking sa mga biktima, nga kasagaran nga delikado nga oras aron mosaka sa bukid nga naputos sa snow.