DAVAO CITY – Mitungtong na sa 5 ang ihap sa mga nakabsan sa kinabuhi gumikan sa Dengue dinhi sa dakbayan sa Davao.
Kini mismo ang gikumpirma ni Elizabeth Banzon, hepe sa CHO Tropical Diseases Prevention and Control Unit.
Ang maong datos ang natala gikan niadtong Bulan sa Enero hangtud Hulyo ning kasamtangang tuig. Dugang pa sa opisyal nga mas midaghan sab ang kaso sa Dengue sa syudad karong panahona kung itandi niadtong milabay nga tuig sa susamang panahon.
Nasayran nga anaa na sa 969 ang natalang kaso sa syudad ning kasamtangan apan giklaro ni Banzon nga under control na sa CHO ang sitwasyon.
Nagpadayon sab ang kanunay nga pahimangno sa buhatan sa tanang katawhang Dabawenyo nga mag-igmat kanunay ug ipabilin ang limpyo nga palibot aron walay mahimong breeding site ang mga lamok ilabi na ang aedes aegypti nga matang sa lamok nga maoy gadala sa sakit nga dengue.
Gawas niini, nagpadayon sab ang mga programa sa buhatan sa pagsumpo sa Dengue sama na lamang sa ilang pagbisita sa mga nagkadaiyang barangay ning syudad aron magpahigayon og fogging ug soaking sa mga musketero ug kurtina.
BY BOMBO ALLIANE SILAO
