Balhog karon sa bilangguan ang lima ka mga indibidwal human nga nadakpan atol sa usa ka entrapment operation nga gilusad sa National Bureau of Investigation – Southeastern Mindanao Regional Office (NBI-SEMRO) tungod sa pagpangilad og pagpameke og mga dokumento pinaagi sa ilahang pagpang-notaryo dinhi sa dakbayan sa Davao.
Sumala pa sa pahayag ni NBI-SEMRO Regional Director Atty. Archie Albao nga walay legal nga otorisasyon ang mga suspek ug ginahimo lang ang notaryo sa mga dokumento sa daplin sa dalan, uban sa barato nga bayad nga makadani sa mga kliyente.
Gikasa ang operasyon human sa mga reklamo gikan sa lehitimong mga abogado nga ilang mga notarial numbers ug stamp gigamit ug peke.
Gitumbok sa imbestigasyon nga peke ang gigamit nga notary public details sa mga dokumento nga ilang gi-notaryo.
Ang mga suspek nasikop sa lain-laing lugar sa Davao City, lakip ang Bolton, C.M. Recto, ug Magallanes, sa operasyon nga gihimo niadtong Lunes sa hapon, Hulyo 28, 2025.
Karung adlawa, Hulyo 29, gipresentar sila sa publiko sa buhatan sa NBI uban sa mga representante sa Integrated Bar of the Philippines – Davao Chapter ug sa Regional Trial Court Branch XI.
Gitakdang atubangon sa lima ang kasong Estafa through Falsification of Documents, usa ka seryosong krimen ilawom sa balaod.
Gi-awhag sa NBI ang publiko nga magpakasiguro nga lisensyado ug tinuod ang ilang gikuhaan og notaryo aron malikayan ang kalibog ug kapakyasan sa legal nga proseso.
