DAVAO CITY – Wala nay kinabuhi ang usa ka 5 anyos nga bata nga giilang si Clark Kent Canda nga lumulupyo sa Brgy. Communal, Buhangin District ning syudad sa Davao kini human nga nalumos sa swimming pool sa San Josue Resort sa Barangay Aliongto ning dakbayan.
Nasayran nga nag-outing ang pamilya Canda sa maong resort apan wala damha nga usa ka trahedya diay ang mahitabo sa nahisgutang bata. Sa gipagawas nga imbestigasyon sa Sasa PNP, nasayran nga nahulog ang maong bata sa pangdagko nga swimming pool ug nadiskubrehan na lamang kining naglutaw human nga masanghiran sa usa ka guest nga giilang si Antonio Parado Jr. ang lawas niini. Gilayong nagpatabang ang guest sa On-Duty Life Guard ug gisulayan sa pag-revive ang maong bata pinaagi sa Cardiopulmonary Resuscitation o CPR apan wala kini response. Dali pang gidala sa ospital ang maong bata apan wala na kini nakaabot pa nga buhi.
