Naglusad na og imbistigasyon ang kapulisan mahitungod sa nahitabong pagpamusil kagabii sa Purok 8, Barangay Manat, Nabunturan, Davao de Oro aron masuta ang motibo ingon man ang responsabli sa maong krimen .
Sumala sa kapulisan sa Nabunturan nga ginasubay niini ang pagkatawo sa biktima nga gihunusan sa kinabuhi pasado alas Otso kagabii.
Giila ang biktima nga si Gary Cabentoy,43-anyos, alyas “Tata Galvas.”
Subay sa inisyal nga imbistigasyon sa kapulisan, gilubngan og mga bala ang lawas sa biktima samtang anaa kini sa karsada nga duol sa Baranggay hall sa Manat.
Gidala pa ang biktima sa Municipal Health Center apan gideklara kini sa mga doktor nga dead on arrival.
Sa crime scene, nakarekober sa kapulisan ang lima ka basyo sa bala nga gituohang gikan sa .45 caliber nga pistola.
