Kabsan sa kinabuhi ang usa ka 41-anyos nga lalaki human gituohang naka-simhot og makahilo nga kemikal samtang nagtrabaho sa usa ka luna sa likod sa iyang balay sa Purok 6-B, Sitio Asang, Barangay Pangyan, Calinan District, Davao City. Giila ang biktima nga si Relly Elisan Semblante, nga nagpatrabaho sa maong lugar aron patukoran og patubig para sa iyang baboyan.
Base sa impormasyon gikan kang Police Captain Hazel Caballero-Tuazon, spokesperson sa DCPO, gisulayan pa unta ni Semblante nga luwason ang trabahante nga si Junrey Jumawan Villar, 31-anyos, nga unang nawad-an og panimuot human makasinghot sa baho nga kemikal. Apan samtang gihiktan pa unta niya og pisi si Villar, nahutdan og panimuot si Semblante ug nahagbong usab sa ilang kinalot.
Gideklarar nga dead-on-arrival si Semblante sa pag-abot sa Central 911 responders. Samtang si Villar, naay naangkon nga mga injury apan naluwas dayon sa ubang trabahante. Sa pagkakaron, gihulat pa sa kapulisan ang opisyal nga resulta sa autopsy aron masuta ang hinungdan sa kamatayon ni Semblante. Padayon usab ang imbestigasyon sa insidente aron sa tukmang dokumento.
