DAVAO CITY – Mukabat sa 400,000 ka mga Pilipino ang kasamtangan giberipika sa Philippine Statistics Authority (PSA) sa posibleng deduplication sa ilang mga National ID.
Kini ang gibutyag ni Registration Officer IV sa Philippine Statistics Authority XI nga si Baby Jean Alid.
Gipasabot niya nga ang deduplication kabahin sa 8 ka proseso sa pagmugna sa national ID.
Diin ang data o mga impormasyon nga nakolekta gikan sa indibidwal, kinahanglan usa mupailawom sa deduplication o ang pagcheck kung aduna ba kini kaparehas nga pangalan o biometrics ayha kini mupadulong sa card production.
Gikanayon ni Alid nga posibleng anaa sa “deduplication” ang mga indibidwal ngano hangtud karon wala pa nila nadawat ang ilang National ID.
Samtang kadtong mga indibidwal nga nakadawat og digital ID, gipasabot ni Alid nga dli kini TEMPORARY tungod usa kini ka “pro-active strategy sa PSA” nga simultaneously gamiton sama sa Physical nga National ID.
Gipasabot usab sa opisyal nga adunay duha ka matang sa National ID diin mao kini ang Physical ug Digital diin sumala ni Alid ang Digital ID adunay tulo ka bersyon nga mao ang EPhilId, ID nga gi-imprenta sa papel, ug ang Downloadable.
Gibutayag sab sa opisyal nga laraw sa PSA nga mumugna og “application Based Mobile”. Samtang sukad Enero 27 ning tuiga, muabot sa 76.2 milion ang narehistro sa PhilSys sa Pilipinas.
