DAVAO CITY – Daw gilubat-lubatan na ug mibati na ug kabalaka sa ilang kinabuhi ang mga 40 ka mga pamilya nga nagpabilin karon sa Purok 26, Camarin, Maa Riverside, ning dakbayan sa Davao human nga gilibutan na ug sin nga koral ang luna nga ilang gipoy-an nga mga ¼ sa 42 ektaryas nga gipanag-iya sa usa ka Narceso Lim.
Sumala pa kang Marites, usa sa mga residente sa Purok 26, Camarin, Maa Riverside, ning dakbayan, nga labihan ka daghan na nga mga guardya ang naglibot kanila ug puros na mga armado ug nagmaskara.
Wala na’y makasulod sa compound sa mga residente nga makagula na gikan sa dapit.
Ang City Hall nga ilang gidangpan namahayag nga lima hangtud sa walo ka adlaw pa ayha masayran kung unsa na’y dangatan sa ilang yangongo.
Gitataw ni Marites nga mga duha ka tuig na ang nakalabay gi-relocate sila sa mga Lim, apan ang nahisgutan nga luna agi-anan sa transmission line sa NAPOCOR ug dili mamahimo nga kabalayan. Kini ang hinungdan nga nagpabilin pa gihapon sila sa Maa.
