Kabsan sa kinabuhi ang upat ka mga indibidwal, samtang 2 ang naangol human nga nagbangga ang duha ka pampasahero nga van samtang naglawig sa Davao-Digos Road, Binugao Gym, Toril ning dakbayan pasado alas 7 sa buntag ning adlawa, Enero 4, 2025.
Ang maong mga indibidwal giila nga si Remie Centena, Edna Centena, Mary Joy Abuda Lastimoso ug Sherlyn Altimo nga lumulupyo sa Awang Cotabato.
Samtang, duha sa mga pasahero ang anaa pa ginaobserbahan sa Southern Philippines Medical Center ug anaa usab ang uban pang naangol sa giingong balay-tambalan.
Saysay sa otoridad, ang usa sa mga van naggikan sa Davao ug mupauli na padulong sa kadalanan sa Digos City, samtang ang usa usab paingon sa Davao gikan sa dakbayan sa Digos diin mikalit kining mi “overshoot” sa pikas linya sa maong karsada.
Sumala pa sa kapolisan, nasayrang nawad-an matud pa og kontrol sa manobela ang driver sa giingong van nga nalambigit sa disgrasya, rason nga nabangga kini sa kasugat nga pribadong van nga maoy matud pa gikan sa Samal Island ug pauli sa Cotabato.
Sa karon padayon pa nga gina-imbistigahan ang nasampit nga panghitabo.
