Nadakpan sa gihimong entrapment operation sa National Bureau of Investigation (NBI) Region 11 ang upat ka mga trabahante sa usa ka real estate firm nga nagbaligya og mga “raw lots” nga walay klarong dokumento sa Barangay Callawa, ning dakbayan sa Davao.
Gipahigayon ang operasyon sa Buhangin, ning syudad kagahapong adlawa diin nasikop ang mga suspetsado sulod sa ilang opisina samtang nagdawat og bayad alang sa yuta nga sumala pa ilahang gibaligya.
Subay sa pamahayag ni NBI-11 spokesperson Agent Ely Leano, aktong nadakpan ang mga trabahante nga nagdawat sa kwarta gikan sa ilahang mga kliyente.
Samtang giklaro usab ni Leano nga wala masikop ang mga sales agents nga direktang nagbaligya sa luna. Giila usab sa mga imbestigador ang tag-iya sa maong kompanya nga nagpailang land developer, apan hangtod karon wala pa kini nadakpan ug ginapangita pa sa mga otoridad.
Gikumpirma usab sa NBI nga sukad pa sa tuig 2019 nagsugod na ang ilahang iligal nga operasyon sa pagpamaligya og luna.
Tulo na ka biktima ang mipasaka og reklamo batok sa grupo, ug posible pa kining madugangan samtang nagapadayon ang imbestigasyon.
Ang mga nadakpan nga trabahante giandam na karon nga pasakaan og kasong estafa ug ipailawom sa inquest proceedings.
Gihingusgan usab sa NBI ang ilahang kampanya batok sa mga iligal nga land developers aron maprotektahan ang katawhan batok sa pagpangilad.
