DAVAO CITY – Patay na nga nakit-an ang kuwatro anyos nga batang lalaki nga na-una nang gika-report nga nawala niadtong milabay nga adlaw sa Los Amigos, Tugbok ning syudad.
Subay sa report sa kapulisan, giila ang biktima nga si Nazareno Casas, kuwatro anyos ang panuigon ug residente sa Purok 17 Bayanihan Wangan, Calinan, Davao city, kinsa nakita ang lawas niini nga nasangit sa mga gapnod sa sapa sa Purok 7, Los Amigos, Tugbok District ning syudad.
Nakita ang patay nga lawas sa bata alas 9 pasado kaganinang buntag sa usaka lalaki nga ginganlan ug alyas Tyanak gumikan sa namatikdan niini nga dili maayong baho sa maong dapit.
Dali usab nga miabot sa lugar ang inahan sa bata nga si Lausa Emma ug positibo niining giila ang biktima nga mao ang iyang anak nga nawala niadtong May 24, 2023.
Sumala pa nalipat ang inahan samtang naligo ang bata ug ulan alas 5 sa hapon ug katapusan kining nakita sa may tulay sa Bayanihan ug nagduha-dula duol sa sapa.
