Labing menos 39 ka mga tawo ang namatay human sa pagbuto ug sunog nga nahitabo sa usa ka pharmaceutical chemical factory sa Telangana, India.
Gipahibalo sa lokal nga gobyerno sa Telangana nga nagporma na sila ug lima ka miyembro nga komite aron tukion ug imbestigahan ang hinungdan sa maong trahedya nga nahitabo sa pabrika sa Sigachi Industries (SIGC.NS).
Base sa inisyal nga imbestigasyon, kapin sa 140 ka empleyado ang anaa sa sulod sa factory dihang nahitabo ang pagbuto.
Daghang mga trabahante ang nasamdan ug dali silang gidala sa mga kasikbit nga balay tambalanan.
Padayon pa ang imbestigasyon sa insidente ug gitutokan karon ang posibilidad sa operational lapses ug safety protocol violations sa maong pabrika.
Gipasalig sa gobyerno sa Telangana nga hatagan og hustisya ang mga biktima ug himuon ang tanang lakang aron malikayan ang susamang insidente sa umaabot.
