DAVAO CITY – Andam na ang tanan alang sa ipahigayon nga mass testing sa mga residente nga taas ang kaso sa Covid-19.
Kahinumduman nga una ng gibutyag ni City health officer Dr. Josephine Villafuerte nga anaa sa 30,000 ka mga indibidwal gikan sa 35 barangay sa siyudad nga adunay taas nga kaso sa Coronavirus-19 ang mopailalom sa mass RT-PCR test o swab test sa siyudad kini aron nga mapugngan ang pagkatag sa kagaw. Sumala pa sa opisyal nga adunay igong swab test kits ang dakbayan.
Gibutyag sab ni Davao City Mayor Inday Sara Duterte-Carpio nga gipatuman karon sa siyudad ang lockdown sa 35 ka mga barangay sa siyudad nga adunay taas nga kaso sa coronavirus disease (COVID-19) apan magdepende pa gihapon kini sa rekomendasyon sa Coordinated Operations to Defeat the Epidemic (CODE) team nga magpabilin sa siyudad aron nga i-assist ang COVID-19 response activities sukad nga subli kining gipailalom sa general community quarantine (GCQ) gikan sa Nobyembre 19 hangtud na sa 30.
Gitataw sab ni Mayor Inday nga ang nahisgutan nga Davao City Task Force COVID-19 wala naghisgot ug bisan unsa man nga lockdown sa nahisgutan nga mga high-risk barangays.
Una na sab nga gipasalig sa opisyal nga andam ang lokal nga kagamhanan nga makiglambigit sa CODE team nga gipadala sa Inter-Agency Task Force (IATF) for the Management of Emerging Infectious Diseases.
Gihan-ay na sab karon sa siyudad ang puwede nga kuhaan sa gamiton nga pundo.
