Nagpasiugda og dako nga search and rescue operation karon ang Coast Guard sa Davao Oriental aron pangitaon ang tulo ka mananagat nga nawala sukad Enero 4, 2026, samtang nagbuhat sa ilang pang-adlaw-adlaw nga trabaho sa kadagatan.
Sumala sa Commander sa CGS Davao Oriental nga si LJGD Joeweskie Sarza, ang mga biktima mao sila si Jeepe Suarez, 40-anyos; Junifer Gumubao, 43-anyos; ug Nonoy Capalit, 35-anyos, nga tanan residente sa Barangay Poblacion, Caraga. Ang tulo nangisda gamit ang motor nga bangka nga ginganlan og “Botika Abby,” kolor yellow ug adunay pula nga katig, sa dagat sa Caraga.
Gi-report nga wala na sila nakontak sukad sa adlaw nga ilang paggawas sa baybayon, hinungdan nga gipalihok ang lokal nga mga rescue team, kauban ang mga barangay tanod ug boluntaryo, aron mapadali ang pagpangita.
Tungod niini, giawhag sa Coast Guard ang katawhan nga kon makit-an ang bangka o ang mga mananagat, dali dayong ipahibalo sa mga otoridad aron masiguro ang ilang kaluwasan ug mabalik sa ilang pamilya. Ang operasyon naglakip sa patrol sa baybayon, pagsusi sa mga isla ug paggamit sa radar ug drone aron mas mapalapad ang coverage sa search effort.
