DAVAO CITY – Hingpit na nga gisuspende sa Sandiganbayan ang tulo ka mga opisyal sa usa ka ahensiya ning dakbayan human ang gipagulang hukom sa kaso nga ilang gikalambigitan partikular na ang kuwestiyonable nga pagpalit ug disinfectants nga nagkantidad ug tres milyones ka pesos kaniadtong 2012.
Matud pa sa Ombudsman, suspendido sulod sa 90 ka adlaw sila si Melani Provido, Isabelita Buduan, ug Marie Ann Constantino gumikan sa kalapasan sa section 3E ug 3G sa Anti-Graft and Corrupt Practices Act (Republic Act No. 3019).
Ang mga nahisgutan susama nga empleyado sa Department of Agriculture (DA) Regional Field Unit XI.
Gipasabot sa Ombudsman nga tumong sa suspensiyon nga dili makahigayon ang mga nahisgutan nga ma-impluwensiyahan ang mga witnesses, maka-tamper ug mga documentary evidence, o makahimo ug mga dili maayong lakang kung anaa pa sila sa buhatan.
Kahinumduman nga kaniadtong Hunyo 2017 gipasakahan sa Ombudsman ang mga akusado ug lain pang DA Regional Field Unit XI officials gumikan sa pagkalambigit sa 2012 deal.
Sa nahisgutan nga panahon, kabahin matud pa ang mga akusado sa technical working group nga maoy nanguna sa pagpalit sa 38 drums sa disinfectants gikan sa FKA Agri-Chemical nga nagkantidad ug P3,040,000.00 kini bisan pa man nga aduna pay lain nga bidder nga mitanyag ug susama nga items sa kantidad lamang nga P2,647,308.00.
