DAVAO CITY – Gitukod na sa lokal nga kagamhanan ang laing tulo pa ka mga coronavirus isolation facilities nga adunay 211 nga beds ug kapin 30 ka mga doktor, nurses ug health support workers ang mo-atiman sa mga pasyente.
Ang pasilidad tawagon nga “We Heal As One Centers” nga nahimutang sa sites nga gitanyag sa private ug ka-partner sa gobyerno sa RMC Petro Gazz Arena, UP Faculty ug Staff Housing ingon man Davao City UP Mindanao Sports Complex Training Gym.
Karong semana, sugdan na ang pagbalhin sa supplies sa RMC Petro Gazz Arena nga adunay 48-bed facility.
Gamiton sa lokal nga panggamhanan ang pipila ka mga classrooms sa Rizal Memorial Colleges (RMC) ngadto sa 30 healthcare workers nga idestino sa pasilidad.
Sa pikas nga bahin, ang UP Faculty ug Staff Housing mamahimon maka-cater ug 35 ka mga pasyente samtang ang Davao City UP Mindanao Sports Complex Training Gym adunay 128 beds.
Samtang padayon karon ang preperasyon sa DC-UP Min Sports Complex Training Gym apan mamahimo na kini nga magamit sa umaabot nga mga adlaw.
Gawas sa mga bag-ong isolation facilities, ang dakbayan sa Davao aduna nay kinatibuk-ang 607 beds ug 13 COVID-19 isolation facilities nga mamahimong maka-cater sa higayon nga mosaka pa ang kaso sa coronavirus infection.
Kabahin sumala pa kini sa pamahayag ni Davao City Mayor Inday Sara Duterte nga target sa lokal nga kagamhanan ang 1,000 beds alang sa posibleng pagsaka sa COVID-19 cases.
