DAVAO DEL SUR – Kabsan sa kinabuhi ang usa ka tres anyos nga bata human kini nahulog ug nalumos ilawom sa ilahang balay sa dagatnong bahin sa Purok Badiawan, Apo Beach, Brgy. Zone III, Sta. Cruz, Davao del Sur, bandang alas-5:30 sa buntag, Mayo 22.
Sumala sa imbestigasyon sa Sta. Cruz Municipal Police, giila ang biktima nga si alyas Kurt, 3 anyos, nagpuyo sa susamang dapit.
Nasayran nga unang nakit-an ang insidente ni alyas Khael, 6 anyos nga Grade 1 student.
Sumala sa nakakita nga samtang naglingkod lamang kini sa gawas dihang nakita niya nga nahulog na ang bata gikan sa kusina sa ilahang panimalay.
Nagpatabang kini sa mga kasilinganan apan walay maski isa nga nitabang sa ilang pagtuo nga “prank” lamang kini. Gikabutyag sa inahan sa biktima nga si alyas Josie nga nangabo lamang kini og tubig sa gawas niadtong panahona mga 50 metros ang gilay-on sa ilahang panimalay, samtang nangatulog pa ang mga igsuon sa biktima.
Gihaya na ang patayng lawas ni alyas Kurt sa usa ka punerarya ug ipasailawom kini sa post mortem examination.
