Nakatala ang Department of Health (DOH) og 28 ka mga kaso sa mga nasamdan tungod sa pabuto sa tibuok nasud karong adlaw sa kapaskohan.
Sa advisory nga gipagawas kagahapong adlawa, gibutyag sa DOH nga walo ka bag-ong kaso ang nareport gikan Disyembre 21 hangtod Disyembre 25 sa alas-4 sa kaadlawon.
Sumala sa datos, 68 porsyento sa mga biktima ang 19 anyos paubos. Kadaghanan sa mga nasamdan gumikan sa mga pabuto nga gama sa boga, 5-star, ug triangle.
Gihagit sa DOH ang publiko nga gilayon nga dad-on sa ospital ang mga biktima sa pabuto ug tawagan ang National Emergency Hotline 911 alang sa paspas nga medikal nga tabang.
Bisan paman niini, giingon sa ahensya nga mas ubos pa sa 50 porsyento ang ihap sa mga kaso kung itandi sa 58 ka firecracker-related injuries nga nareport sa miaging tuig sa susama nga mga adlaw.
Ang datos gikan sa 62 ka sentinel hospitals nga gi-monitor sa DOH.
Samtang nagpabilin ang holiday monitoring sa DOH hangtod Enero 5, 2026, uban sa panawagan nga likayan ang paggamit sa mga pabuto alang sa mas luwas nga selebrasyon sa Bag-ong Tuig.
