DAVAO CITY – Gibutyag sa amahan sa usa ka 26 anyos nga lalaki kinsa nanunggab sa duruha ka mga indibidwal sulod sa Gaisano Mall sa Tagum sa milabay nga gabie nga nakasinate ug depression ang iyang anak gumikan kay wala niini naangkon ang iyang tinguha nga magpapayat.
Sa ulahing impormasyon, nakabsan na sa kinabuhi ang suspek nga si Jayson Torreda, residente sa Purok 8, Barangay Poblacion Mawab Davao de Oro nga una ng gipusil sa mga sakop sa kapulisan human ang gihimo niining pagpangatake.
Kahinumduman nga misulod ang suspek sa kitchen ware sa 3rd floor sa mall ug mikuha ug kutsilyo.
Gidunggab niini ang usa ka Promodiser ug Sekyo hinungdan nga daling miresponde ang mga sakop sa kapulisan.
Naila ang mga biktima nga sila si Sherwin Bustamante, 23-anyos, promodiser kinsa nakaangkon kini ug samad sa iyang ulo ug ang security guard nga si Ronald Costan, 45-anyos.
Kahinumduman nga dali pa nga gidala sa balay tambalanan ang suspek apan nakutloan na kini sa iyang kinabuhi. Padayon sab karon nga gi-obserbahan ang kahimtang sa biktima nga si Bustamante nga gikanayong anaa sa talandugong ang kahimtang samtang nagpa-alim na karon si Costan.
Nasayran nga gi-ubanan pa sa iyang amahan ang biktima sa pagsuroy sa Mall apan kalit kini nga nawala ug nasayran na lamang niini nga adunay natigayon nga kagubot nga gikalambigitan sa iyang anak. Dugang pagpanubay ang gipahigayon karon sa otoridad.
