DAVAO CITY – Gibana-banaang mokabat sa 25,000 ka mga delegado gikan sa nagkadaiyang nasud ang laoman nga magtapok atol sa ipahigayon nga 6th Association of Southeast Asian Nation (Asean) Boy Scout Jamboree nga gikatakda sa Nobyembre 27 hangtud Disyembre 2 sa Energy Park, Apokon, Tagum City, Davao del Norte.
Segun ni Davao del Norte Provincial Police Office chief Senior Superintendent Marciano Magistrado anaa sa kapin 1,000 ka mga personahe sa Armed Forces of the Philippines ug Philippine National Police ang ipakatag sa lugar aron nga masiguro ang kaluwasan ug seguridad sa mga partisipante.
Gibutyag sab sa opisyal na sa kasamtangan, gisugdan na nila ang pagpahigayon ug pagpakighinabi sa mga nagkadaiyang ahensiya aron nga magmalapuson ang pag-host sa maong aktibidad ug walay matalang bisan unsa man nga untoward incidents.
Laoman sumala pa nga sa pagtapos sa Jamboree, adunay katakos ang mga partisipante nga i-promotar ang Asean Community ug Solidarity.
