Gipahayag ni kanhing House Speaker Martin Romualdez sa iyang supplemental counter-affidavit nga pipila sa 25 ka kanhing security aides ni kanhing Ako Bicol Party-list Representative Elizaldy Co ang giingong gidasig ni Atty. Levito Baligod nga mouban sa 18 ka bodyguards.
Sumala pa sa mga affidavit of denial ug non-participation nga gisumite sa 25 ka security aides, giingong gi-imbita sila ni Baligod nga mouban sa 18 ka bodyguards, nga una nga gitawag nga 18 ex-Marines, baylo sa kuwarta bisan wala sila’y personal nga kahibalo sa mga alegasyon nga ilang gipadayag.
Ang 18 ka bodyguards mao ang mga testigo nga girepresentahan ni Baligod, apan nahimong 14 na lamang human mibawi sa ilang unang mga pahayag ang pipila kanila.
Dugang pa niini, giingong walay bisan usa sa 25 ka security aides ang nakahimo og deliveries sa tibuok nilang panahon sa pagpanarbaho hangtod sa 2025 ug 2026, nga supak sa mga alegasyon sa 18 ka bodyguards batok kang Romualdez.
Gipahayag usab ni Romualdez nga sumala sa usa sa 25 ka kanhing security aides nga si Arnilo Ramirez, nagplano kuno si Baligod og ikaduhang grupo sa mga testigo human sa 18 ka bodyguards.
Lakip sa maong alegasyon, giingong gidala si Ramirez ug uban pa ngadto sa usa ka hotel tali sa Marso ug Abril 2026 aron mopirma sa usa ka giandam nang affidavit.
Gipunting usab sa affidavit ang magkasumpaki nga mga pahayag kalabot sa giingong pagdala og mga maleta. Matod sa mga pahayag nila Christopher T. Esquivel, Gil N. Navidad Jr. ug Rodante P. Orbillo, adunay mga tawo nga miuban o mitabang kanila sa maong kalihokan.
Apan gilimod sa mga tawong ilang gikutlo ang maong alegasyon ug nanumpa nga tinuod ang ilang mga pahayag.
Sa pagkakaron, gilakip ni Romualdez ang maong mga alegasyon sa iyang supplemental counter-affidavit nga gisumite sa Office of the Ombudsman.
Kahinumduman nga niadtong Huwebes, gisumite ni Romualdez ang maong supplemental counter-affidavit isip tubag sa mga alegasyon batok kaniya.
