Mokabat sa 23 ka mga vintage bomb ang nakalutan sa mga otoridad sa Purok Balite, Barangay Buhangin ning syudad sa Davao niadtong Sabado, Enero 24.
Sumala pa sa report gikan sa mga otoridad, ang mga narekober nga mga bomba ang wala pa mapabuto nga mga explosive ordnance (UXO) nga gituohang mga bomba pa kini sa panahon sa Ikaduhang Gubat sa Kalibutan nga anaa gilubong taliwala sa mga kakahuyan ug mga tanom sa maong dapit.
Sa gipahigayon nga teknikal nga inspeksyon, giila ang mga butang isip Type 99, No. 3, Mark 3 nga mga bomba nga gikan sa Japanese Navy, nga adunay kinatibuk-ang gibug-aton nga kapin 32 ka kilos.
Sumala pa sa mga otoridad makahatod na kini og hulga sa mga residente sa palibot tungod sa dili na maayung kahimtang sa mga eksplosibo.
Gipahigayon ang operasyon sa mga personahe sa 3rd Explosive Ordnance Disposal (EOD) Platoon sa Philippine Army, nga gipangulohan ni MSg Jonhmar M. Sudio ug Sgt. Ryan B. Vilando, uban sa koordinasyon sa AFP K9, Task Force Davao, ug NBI Region XI.
