Gihatagan og pardon sa gobyerno sa United Arab Emirates (UAE) ang kapin 220 ka mga Filipino nga naka priso sa maong nasud.
Ang maong pardon gihimo uban sa pagsaulog sa ika-53 nga National Day sa UAE ug pinaagi sa representasyon ni Pangulong Ferdinand Marcos Jr. ug ang counterpart niini.
Tradisyon na usab sa liderato sa UAE ang paghatag og pardon uban sa pagselebrar ilang sa National Day.
Gipahibalo sa gobyerno sa UAE ang paghatag og pardon sa mga naka priso nga mga Filipino, isip timaan sa espesyal nga relasyon tali sa duha ka nasud.
Kini resulta sa panagpulong ni Pangulong Ferdinand Marcos Jr. ug His Highness Sheikh Mohamed Bin Zayed Al Nahyan, Pangulo sa United Arab Emirates, kaniadtong Nobyembre, miaging tuig.
Sa pagka karon, ginaproseso na sa Department of Foreign Affairs (DFA) ug sa Philippine Embassy sa Abu Dhabi ang mga dokumento ug administratibo nga mga kinahanglanon alang sa pagpauli sa mga Filipino nga napardon sa UAE.
Ang mga napardon nga Pinoy gipa priso gumikan sa lain-laing mga kalapasan.
Kaniadtong Hunyo 2024, kapin 143 ka mga Filipino ang napriso sa UAE ug gipardon usab atol sa pagsaulog sa Eid al-Adha.
