Natala na ang 22 ka mga aftershocks human sa linog nga nahitabo sa baybayon sa Davao Occidental kaganihang buntag, sumala sa Philippine Institute of Volcanology and Seismology (PHIVOLCS).
Ang linog nga adunay magnitude 6.1 miigo sa kadagatan nga bahin sa Davao Occidental.
Ang pag-igo sa linog nahitabo alas 7:07 sa buntag, duol sa Sarangani Island, munisipalidad sa Sarangani, Davao Occidental. Samtang ang kalawom sa gibana-banaan nga anaa sa 79 kilometros ug kini usa ka tectonic nga klase sa linog.
Nasayran nga ang labing kusog nga intensity nga natala mao ang Intensity 5 nga kini nasinati-an sa Glan ug Malungon sa Sarangani, ug sa Pantukan, Davao de Oro.
Sumala pa sa PHIVOLCS, wala kini nagdala og hulga sa tsunami, ug walay gilauman usab nga adunay kadaot sa mga kabtangan gumikan sa maong pagtay-og.
Apan gibutyag usab sa ahensya nga, ang mga linog nga ingon niini kakusog posible nga moresulta og dili kasagarang kalihukan sa tubig-dagat, nga mahimong mamatikdan sa mga kabaybayon nga duol sa epicenter sa linog ug kasikbit nga mga lugar.
Kahinumduman nga una ng gikatala ang 6.9 magnitude nga linog sa Phivolcs apan gipaubos kini ngadto sa 6.1 magnitude.
Nasayran nga kini na ang ika-tulo nga sagunson nga linog ang natala dinhi sa rehiyon karon lamang semanaha diin natigayon niadtong Lunes sa kadagatan sa Bagangga, Davao Oriental ang 6.4 magnitude og 5.1 sa munisipalidad sa Governor Generoso Davao Oriental.
Gumikan niini, padayon karon ang pahimangno sa mga hingtungdan nga ahensya nga kanunay nga alerto sa panahon sa mga emerhensya ilabi na sa linog.
