Gihuman ang usa ka buwang De-Radicalization ug Healing & Reconciliation Program sa Kalayaan Center, Nabunturan, Davao de Oro nga gitambongan sa 22 ka kanhing rebelde (FRs). Gisugdan ang maong programa niadtong Marso 11 ug natapos sa Abril 11, 2025 isip kabahin sa paningkamot sa gobyerno sa pagpahiuli sa mga Former Rebels (FRs) ngadto sa normal nga kinabuhi.
Mitambong sa closing ceremony si Brig. General Felix Ronnie Babac, Commander sa 1001st Infantry “PAG-ASA” Brigade, kauban si Ms. Josephine Frasco, Provincial Social Welfare and Development Officer sa Davao de Oro. Sa iyang mensahe, gilatid ni General Babac ang iyang pasalamat sa tanang stakeholders nga naningkamot sa maong programa ubos sa EO 70 ug NTF-ELCAC framework. Gibati usab niya ang kalipay sa kaisog sa mga Former Rebels (FRs) sa pagbiya sa armadong pakigbisog ug pagdawat sa bag-ong kinabuhi.
Gituyo ang maong programa aron tabangan ang mga kanhing miyembro sa CPP-NPA nga magbag-o ug mahimong produktibong miyembro sa komunidad. Pinaagi sa maong inisyatibo, giandam ang mga kanhi rebelde alang sa ilang pag-apil sa Enhanced Comprehensive Local Integration Program (E-CLIP), nga magahatag kanila og oportunidad nga makabalik sa sabakan sa katilingban nga gawas sa impluwensya sa terorismo.
