DAVAO CITY – Alegre ang nahimong pormal nga pag-abli sa Davao Regional Athletic Association (Davraa) kagahapong adlawa, Marso 19 nga gipahigayon sa Mati Oriental.
Gibana-banaan nga mukabat sa 6,000 ka mga delegado ang misalmot ug misaksi sa maong aktibidad.
Una na nga gikanayon ni Police Regional Office (PRO) Davao Region, spokesperson Chief Inspector Andrea dela Cerna ang hugot nga seguridad pasulod man ug pagawas sa Davao Oriental.
Nagkatag sab ang dul-an 300 ka mga pulis sa lugar gawas pa niini ang mga kasundalohan ug mga volunteers.
Istrikto nga paagi sab sa pagkapkap ug pag-inspeksyon sa mga bisita ug mga atleta nga mosulod sa patigayonan sa programa ang ilang gihimo.
Lakip na ang paghiling sa mga bagahe ug ang plain view sa mga sakyanan nga mosulod sa Mati City aron maseguro ang kaluwasan sa tanan.
Buot sa kapulisan nga anaa sa luwas ang mga bisita ug atleta nga gikan sa nagkalain-laing mga lugar sa Davao Region.
Gimuntar sab sa lokal nga kagamhanan sa Davao Oriental ang medical team nga dali ra nga moresponde panahon kung dunay emerhensiya.
Kahinumdoman nga una nang nanawagan si Davao Oriental Governor Nelson Dayanghirang sa mga rebeldeng New People’s Army (NPA) nga di manghasi atol sa maong aktibidad.
