Gipahibalo sa Commission on Elections (Comelec) ang lista sa 21 ka kontratista nga giingong naghatag og donasyon sa pipila ka kandidato atol sa 2025 midterm elections.
Sumala ni Comelec Chairman George Erwin Garcia, ang impormasyon gibase sa 42,000 ka Statements of Contributions and Expenditures (SOCEs) nga gisumite sa mga kandidato ug gilusad og masusi nga pagrepaso sa legal department sa ahensya.
Matod pa ni Garcia, dili pasabot nga kung 21 ang kontratista, 21 usab ang kandidato nga nalambigit. Gipasabot niya nga walo (8) ra sa mga kandidato ang gitumbok nga nakadawat og kontribusyon gikan sa maong mga kontratista. “Pananglitan, usa ka kandidato, daghan kontratista ang naghatag kaniya og donasyon,” dugang pa ni Garcia.
Giklaro usab sa opisyal nga dili molapas og duha ka semana ang imbestigasyon nga ilang ginahimo ug human niini, ipasa dayon nila ang resulta sa Department of Public Works and Highways (DPWH) alang sa kumpirmasyon. Gipangayo karon sa Comelec ang opisyal nga listahan sa mga accredited government contractors gikan sa DPWH aron mapamatud-an kung tinuod nga ang mga ngalan nga ilang nakuha sa SOCEs mao gyud ang mga kontratista sa gobyerno.
Sa dihang makumpirma, gikatakda sa Comelec nga magpadala og opisyal nga sulat sa DPWH ug ipahibalo sa publiko ang resulta sa ilang imbestigasyon. Si Garcia midugang nga kini nga lakang kabahin sa paningkamot sa Comelec nga mas mapahugot ang transparency ug accountability sa gasto sa kampanya sa mga kandidato.
