DAVAO CITY – Angayan sumala pa nga manguna ang mga ginikanan sa pag-edukar sa ilang mga anak kalabot sa reproductive health ayha nila kini makat-onan sa tulonghaan o sa ilang mga higala nga mohatag ug sayop nga impormasyon.
Kini ang gibutyag ni konsehal Mary Joselle Villafuerte.
Matud pa sa opisyal, kinahanglan pa nila nga subayon ang school syllabus sa mga tulonghaan nga nagtudlo na karon ug reproductive health sa ilang mga estudyante.
Tipik lamang ang pahayag sa opisyal human ang nadawat nga mga reaksiyon sa nahimong plano sa Department of Health nga manghatag ug condom ngatod sa mga kabataan aron nga makunhuran ang suliran sa teenage pregnancy ug malikayan ang pagkatag sa sakit nga human immunodeficiency virus o HIV.
Gitataw sab ni Villafuerte nga usa sa mga hinungdan nganong nakadawat ug daghanang reaksiyon ang maong lakang sa DOH kini tungod wala sumala pa kini napasabot pag-ayo sa publiko.
Gikanayong usa sumala pa sa mga suliran nga gi-atubang karon sa Davao region mao ang pagsaka sa ihap sa teenage pregnancy.
Subay sa gipahigayon nga pagtuon, nga sa sa 960,000 ka mga kabataan sa Davao Region, 18 per cent o 42,000 sa mga kababaehan nga edad 15-19 anyos ang nagbaton na ug anak kung itandi sa walo ka porsyento lamang kaniadtong 2002.
Anaa sab sa tulo ka porsyento sa mga kababaenhan nga susama ug age bracket ang sagad mabuntis sa ilang una nga anak samtang 14 percent ang hingpit na nga nahimong mga inahan.
