DAVAO CITY – Gibutyag ni Mabini Compostela Valley Mayor Reynaldo Dayanghirang nga nagsugod na pagbalik sa ilang mga pinuy-anan ang mga residente nga mibakwit human ang nahitabong engkuwentro tali sa militar ug kasundalohan.
Gikumpirma sumala pa ni Cabuyoan Barangay Captain Romeo Aban nga uwas na ang mga residente nga makabalik sa ilang mga panimalay.
Gipasalig sa Mayor nga hatagan ug hinabang ang mga apektadong residente pinaagi sa municipal social services office human nga nanghiklin ang mga nahisgutan dihang nahitabo ang bakbakan tali sa mga rebelde ug militar sa sitios Patawon ug Magpalusong sa Barangay Cabuyoan.
Hinuon wala sumala pay natalang casualties sa bahin sa mga sibiliyan gawas lamang sa tulo ka mga sundalo nga samaran human nga mibusikad ang gitanom nga IED.
Nanawagan sab karon ang Save Our Schools Network (SOS) in Southern Mindanao Region sa publiko nga tabangan ang mga Lumad ug apektadong mga mag-uuma sa Sitio Magpalusong sa Patawon sa Barangay Cabuyuan gumikan kay nanginahanglan sumala pa ang mga nahisgutan ug pagkaon, tambal ug senina ilabi na nga kadaghanan sa mga nahisgutan ang wala nakadala ug pagkaon human ang ilang paghiklin.
