DAVAO CITY – Gipanghikling ang anaa sa 20 ka mga pamilya sa Barangay Matiao, Mati City, Davao Oriental kagabie, gumikan sa nasinatiang kusog nga pagbundak sa ulan nga miresulta sa pagbaha sa maong lugar.
Nasayran nga mi-awas ang tubig sa creek ingon man sa sapa human ang sagunson nga pag-ulan hatud sa localized thunderstorms.
Gilayon usab nga nagpahigayon ang Mati City Local Government og preemptive evacuation sa pipila ka mga purok nga gilangkuban sa Daisy 1 ug Rosal sa Mapantad, Barangay Sainz ug sa Dalisay 1, Purok Malinawon-1 sa Barangay Matiao. Una na nga gipa-igmat sa panggamhanan sa maong syudad ang mga residente human nga miabot sa Code red ang Echavia Creek, Lopez Creek, ug Cebuley Creek sa Barangay Matiao kagahapon.
Gawas niini, nasayran sab nga alas 8:00 kagabii, adunay nahitabong pagdahili sa bato sa Badas View Deck. Hinoon, nagmaayo na ang kahimtang sa panahon diin namalik na ang ubang pamilya ngadto sa ilang mga panimalay samtang ang uban ang nagpabilin pa gihapon sa evacuation centers.
BY BOMBO ALLIANNE SILAO
