DAVAO CITY – Mokabat sa 20 ka mga firefighter volunteer teams gikan sa nagkadaiyang Barangay ug industrial companies ning dakbayan sa Davao ang magtigi sa ipahigayon nga 9th Inter-Barangay Fire Volunteer and Industrial Combat Challenge sa Marso 25 sa usa ka Unibersidad ning siyudad isip kabahin sa month-long observance sa Fire Prevention Month.
Kahinumduman nga ang kasaulogan karong tuiga adunay tema nga “Buhay at Ari-arian ay Pahalagahan, Ibayong Pag-iingat sa Sunog ay sa Sariling Pamayanan Simulan,” diin suportado niini ang adbokasiya sa gobyerno aron nga magbaton ug kaalam ang katawhan kung paunsa makalikay sa sunog.
Tumong sab sa maong aktibidad nga masulayan ang kapasidad sa mga fire volunteers sa pagresponde panahon sa sunog nga mo-igo sa ilang area ingon man pagpanday ug maayong relasyon ngadto sa ilang mga kaubanan nga mga fire volunteers.
Gitataw sab ni BFP Davao public information officer Christian Cena nga pinaagi sab sa maong event, madetermina nila ang level sa kaalam sa matag grupo sa mga bombero ingon man sa mga bag-ong miyembro niini.
Gawas sa mga pamaagi sa pag-responde sa sunog, masulayan sab ang kapasidad sa mga volunteers sa rescue operation.
