Nasikop ang 20 ka mga Chinese nationals sa hiniusang operasyon sa Bureau of Immigration XI ug 10th Infantry Division sa Pantukan, Davao de Oro ug Tagum City, Davao del Norte niadtong Abril 22, 2026, tungod sa mga paglapas sa balaod sa imigrasyon.
Sumala sa mga otoridad, atol sa pagpatuman sa Mission Orders 2026-151 ug 152 batok sa mga langyaw nga naglapas sa Philippine Immigration Act of 1940, nadiskubre usab ang giingong iligal nga pagmina sa maong lugar human mapakyas ang mga nadakpan sa pagpakita sa hustong permit ug dokumento.
Lakip sa mga nasuta sa operasyon ang presensya sa mga mineral resources, heavy equipment, eksplosibo, ug mga uniporme nga giingong gikan sa People’s Liberation Army, nga nagpasabot og posibleng koneksyon sa iligal nga mining network.
Subay sa inisyal nga imbestigasyon, ang mga nadakpan nga puro adunay tourist visa, apan giingong nag-overstay ug posibleng makasuhan ubos sa Section 37(a)(9) kalabot sa Section 45(e) sa Philippine Immigration Act of 1940 tungod sa pagka-expire sa ilahang visa.
Dugang pa, giandam na usab sa mga otoridad ang posibleng kaso batok kanila ilawom sa Republic Act No. 7942.
Sa pagkakaron, gipadayag sa imbestigasyon nga dugay na diay nga nalambigit ang mga langyaw sa ginagmay nga iligal nga pagmina sa lugar, lakip ang pagkuha og bulawan ug uban pang mineral ores nga giingong ipalusot gawas sa nasud.
Matud pa ni Brig.Gen.Alvin Luzon, Commander sa 10ID, nga bug-os nilang gisuportahan ang BI XI sa legal nga pagpatuman sa misyon, ug nagpakita kini sa kamahinungdanon sa koordinasyon sa nagkadaiyang ahensya batok sa mga kalihokan nga naghulga sa natural resources ug national security.
Sa kasamtangan, nagpadayon pa ang lawom nga imbestigasyon sa mga otoridad aron masuta ang gilapdon sa iligal nga pagmina ug ang posibleng implikasyon niini sa seguridad sa nasud.
