DAVAO CITY – Duha patay, usa ang samaron samtang usa ka Amasona ang nadakpan sa awtoridad human sa nahitabong engkwentro tali sa New People’s Army (NPA) ug militar sa Sitio Bayongon, Brgy. Astorga Sta Cruz Davao del Sur alas 11:25 sa buntag sa nakalabay lamang nga adlaw.
Naila ang na-arestong miyembro sa NPA nga mao si Jessa Lumana samtang padayon pa karon nga ginasuta ang identity sa namatay gikan sa mga rebelde.
Sa bahin sa kasundalohan, samaron ang usa ka Kenneth James Balicol nga anaa na karon sa luwas nga kahimtang human kini nadala sa balay tambalanan.
Subay sa report, nagpahigayon ug combat patrol operation ang mga sakop sa 39 Infantry Battalion sa nahisgutang lugar sa dihang ilang naka enkwentro ang dili muubos 30 ka mga sakop sa mga rebelde gikan sa Guerilla Front 51 sa Southern Mindanao regional Command.
Milungtad usab sa pipila ka minutos ang pagbinay-luay sa bala tali sa duha ka grupo dayon niikyas ang mga rebelde ug nabilin ang gibiyaang mga armas nga gilangkuban sa M16, 3 ka mga IED’s, 2 ka rifle grenade, tulo ka tag-as ug tulo ka mugbo nga magazine, 2 ka ICOM radio, 7 ka backpacks, flags lakip ang mga medical supplies ug personal nga kagamitan sa mga rebelde.
Sa gihimong follow up search and clearing operation, niresponde ang sakop sa usa ka impormasyon kalabut sa samarung NPA member nga nagpailang si Julito Pueblas alias Taghoy ang Commanding Officer sa Sentro de Grabidad, GF51, SMRC apan walay swerte tungod nakutluan kini sa iyang kinabuhi sa wala pa man kini nadala sa pagpamasin nga maluwas sa iyang mga nahi-aguman atol sa engkwentro.
Sa kasamtangan, naglusad na ug mas gipahugtang checkpoints sa mga utlanan ang hiniusang pwersa sa otoridad sa maong lugar arun sa posibleng pagkasikop sa nakasibat nga mga rebeldeng NPA.
