DAVAO CITY – Andam matud pa ang duruha ka mga lider sa New People’s Army (NPA) nga mibalik sa sabakan sa kagamhanan nga mohatag sa ilang suporta ngadto sa kasundalohan aron nga ipadayon ang operasyon batok insurhensiya.
Kahinumduman nga mitahan ang commander ug vice commander sa Pulang Bagani Command (PBC) 2 sa New People’s Army (NPA) human ang nahitabong engkuwentro sa Barangay Tambobong, Baguio District, Davao City.
Una ng naila ang mga nahisgutan nga sila si alyas Bong, commander sa NPA nga walo ka tuig na sa kalihukan ug alyas Igong, vice commander ug siyam ka tuig na sa komunistang grupo.
Una ng nakig-atubang ang duruha kang Mayor Inday Sara Duterte-Carpio ug gisaraan sila nga motabang ang gobyerno aron nga makasugod sila sa ilang bag-ong kinabuhi. Kahinumduman nga dungan sa ilang pagtahan, daghanang mga armas sab ang narekober sa militar human nga ila kining gitug-an nga gilangkuban sa walo ka M16 rifle, usa ka M4 carbine, usa ka .45 caliber, hand grenade ug usa ka Glock 17 nga susama nga gipanag-iyahan sa Philippine National Police.
