DAVAO CITY – Patay ang duha katawo sa nahitabong pagbaha ug landslide sa Malalag, Davao del Sur. Kini gumikan sa pag-ulan nga hatod sa Intertropical Convergence Zone kon ITCZ. Kagahapong adlawa, gipailawom na sa State of Calamity ang Malalag, kini subay Resolution no. 188, Series of 2022.
Nasayran nga gumikan sa kusog nga pag-ulan sukad ning nakalabay’ng adlaw, gibaha ang Onse ka Brgy. sa Malalag partikular na ang Poblacion, Bulacan, Caputian, Bolton, Tagansule, Bagumbayan, Baybay, New Baclayon, Kiblagon, Brgy. Pitu ug Ibo kon diin dunay duha ka tawo nga nalatang patay.
Nabalda usab ang dagan sa trapiko kagahapong adlawa, ug na stranded ang mga sakyanan gumikan sa nahitabong landslide sa National Road nga nagkonekta sa Digos City ngadto sa General Santos in partikular sa Balunan, Malalag, Davao del Sur, ug naguba usab ang tulay ng Pangulo sa Upper Malinao, Padada sa susamang probinsya.
Gawas niini, nagpakanaog usab og Memorandum si Malalag Municipal Mayor Peter Paul Tan Valentin alang sa suspension sa classes kagahapong adlawa. Samtang gikatakdang mag resume usab ang trabaho sa munisipyo sa Malalag karong adlawa.
Sa pikas bahin, gipailawom usab sa State of Calamity ang lungsod sa Sta. Maria, Davao Occidental kagahapong adlawa. Gumikan sa damyos nga hatod sa pagbaha ug landslide, gipirmahan ni Sta. Maria Mayor Claude Benjamin Bautista II ang resolution No. 74, series of 2022 aron mahatagan ug gahum ang LGU nga magamit ang ilang calamity fund.
