Gitabangan sa lokal nga panggamhanan sa Lupon Davao Oriental ang duha ka mga langyaw nga nabiktima sa love scam.
Subay sa gipaguwang pamahayag sa buhatan ni Mayor Sonny Q. Alonzo Jr. nga niadtong Hulyo 11 ang duha ka mga langyaw nga gikan sa Poland ug ang usa gikan sa Turkey nabiktima sumala pa sa love scam sa nasampit nga munisipalidad.
Tungod niini, midangop ang mga langyaw sa otoridad ug kini ang gihatagan og pagtagad sa lokal nga panggamhanan.
Atol sa ilahang pagpresenta sa duha ka mga langyaw kauban sila Konsehal Dennis Roflo, Rey Suriba, ug Cenen Angcinco, ug pinaagi usab sa suporta sa Department of Social Welfare and Development (DSWD) ilawom sa ilang Balik-Probinsya Program, dali nga gihatagan og ayuda ang mga langyaw samtang sila anaa pa sa Lupon.
Gikasabotan usab nga personal nga mokuyog paingon sa Manila ang staff sa mayor ug si Mr. Manolito Callao, representante sa OWWA sa Lupon, aron masiguro ang luwas ug husto nga turnover sa mga langyaw ngadto sa ilang tagsa-tagsa ka mga embahada. Giplano na usab ang dugang nga lakang alang sa ilang pagpauli sa ilang nasod.
Nagpahayag usab og dakong pasalamat ang Municipal Government sa Lupon ngadto sa mga buotan ug manggiluy-on nga mga lumulupyo nga mihatag og panalipod ug pag-atiman sa duha ka langyaw atol sa ilang pagpabilin sa nasampit nga munisipalidad.
Kini nga panaghiusa ug paningkamot nagpakita sa tinuod nga kalooy, paspas nga aksyon, ug responsableng tigdumala sa Lupon bisan pa man sa nasodnong gigikanan sa mga nanginahanglan.
