Nasikop sa kapulisan sa Panabo City ang duha ka giingong drug suspects nga nailhang sila Alyas “J-Boy” ug “Mariel” atol sa gipahigayong buy-bust operation sa Barangay New Visayas, Panabo City, Davao del Norte niadtong Hunyo 24.
Sumala pa sa Panabo City Police Station, nahitabo ang operasyon alas 4 sa hapon ubos sa pagdumala ni PLTCOL Dexter R. Cuevas, kauban ang mga personahe sa 2nd DNPMFC ug sa koordinasyon sa PDEA Davao del Norte. Dugang pa niini, nasikop ang duha ka suspetsado human mapalitan og gituohang shabu sa nagpailang poseur buyer. Lakip sa mga nakumpiska ang tulo ka sachet sa gidudahang shabu nga adunay gibana-banang timbang nga 0.35 gramos ug balor nga ₱2,380 base sa Standard Drug Price.
Sa kasamtangan, gihuptan na sa kustodiya sa Panabo City Police Station ang mga suspetsado samtang giandam ang kasong kalapasan sa Republic Act 9165 o ang Comprehensive Dangerous Drugs Act of 2002 batok kanila.Kahinumduman nga padayon ang kampanya sa kapulisan batok sa ilegal nga droga, samtang nag-awhag usab kini sa publiko nga magpabiling mabinantayon ug motaho sa mga kadudahang kalihokan aron mapadayon ang kalinaw ug kahapsay sa komunidad.
