DAVAO CITY – Gipangpaslak karon sa bilanggoan ang gikanayong mga Drug Den Visitors human nga nasikop ang mga nahisgutan sa gilusad nga operasyon sa mga sakop sa Davao del Sur Provincial Office sa Philippine Drug Enforcement Agency Regional Office XI kaabag ang Davao del Sur Police Provincial Office Provincial Drug Enforcement Unit ug Digos City Police Station.
Gilusad ang operasyon nga miresulta sa pagkabungkag sa drug den sa Purok Gemelina Centro, Barangay San Miguel, Digos City.
Atol sa operasyon, nakaikyas ang suspek nga si Jeverlon Orcullo alyas Sadam human kini nakamatikod sa otoridad.
Apan naabtan ang duruha ka mga drug den visitors nga nailang sila si Jaymark Orcullo alyas King-king ug Joey Cobol nga naabtan sa nahisgutan nga lugar.
Upat ka mga transparent plastic sachets nga gi-undan sa gikatahapang shabu ug motimbang sa kapin kun kulang (2) grams o adunay street value nga Php. 32,000, drug paraphernalia ug buy-bust ug boodle money ang narekober gikan sa dinakpan.
Gibalhug karon ang mga suspek sa PDEA Davao del Sur Provincial Office detention facility. Ang mga narekober nga illegal drugs gikan sa mga suspek ang gisumite karon sa PDEA Regional Office XI Laboratory Service alang sa eksaminasyon.
Naghulat na lamang ang mga dinakpan sa mosunod nga kamandoan sa korte sa ilang gi-atubang nga reklamo.
